Samsetning

Samsetning er nú í fullum gangi. Ég eyddi páskunum mest öllum í bílskúrnum. Þetta tekur allt mjög mikinn tíma þegar svona er staðið að verki þ.e.a.s þegar allt á að líta út eins og daginn sem það rúllaði af færibandinu í trollhattan. Ég slípaði ventlana og sætin í heddinu, þvoði gírkassann úr 90-unni sem fer í túrbóinn, verkaði gamlar pakkningar sem ekki eru æskilegar ef nýjar pakkningar eiga að koma í þeirra stað en þetta er þó ekki tæmandi listi yfir atburðarrásina.

Heddið fór svo á í gær þannig að ekki líður að löngu þar til gírkassinn fer neðan á vélina og eftir það skrúfast hver smáhluturinn á fætur öðrum á vélina og þá er hún svo gott sem klár.

Þá getur Þórir farið að vinna í sinni vél (vélin mín er ennþá á vélastandinum en fer þaðan um helgi) en hann ætlar að setja 16 ventla túrbóvél í 99una sína sem er töff. Ekki leiðinlegt að eiga landsins fljótustu 99. Einhverntíma ætla ég að eiga landsins fljótasta 900 SAABinn, en það verður þó ekki fyrr en ég get keypt mér gírkassa sem er ekki samsettur úr smjöri.

Ég hef ekkert farið ennþá í verkstæðið þar sem bílinn er eftir páska, en ég fer bara á morgun eða föstudag. Á ekki beint von á því að þeir verði búnir með bílinn þá, reynslan hefur nefninlega kennt mér að treysta ekki á þá.

Later!

Gangurinn langi

Nú er allt að gerast. Ég setti sveifarásinn í vélina mína í gær. Áður hafði ég unnið hellings vinnu við að pólera stimpilkollana og hreinsa stimplana ásamt því að þrífa vélina að innan og mála að utan með svörtum lit. Einnig var ég fyrir nokkru búinn að hóna vélina, þannig að nú er ekkert annað en að raða henni saman.

Málun bílsins gengur þolanlega núna, búið er að draga í hann og sprauta með fylligrunni strákurinn vann víst 16 tíma um helgina í honum. Ég fæ hann samt ekki til baka fyrir páska þó svo að ég hafi lagt alla áherslu á það. Ég verð líka kannski að taka tillit til þess að þeim vantar þrjá menn í vinnu. Það er allavega eitthvað að gerast í þessu hjá þeim núna (mér datt reyndar í hug í dag að ég þyrfti kannski bara að fara uppeftir í fyrramálið og vinna bara í honum sjálfur).

Jæja það fer víst illa með hjartað að vera fúll og pirraður, ég þakka mínum sæla fyrir á meðan ekki rignir kýrhölum. Ég kem þá bara vélinni saman yfir páskana...

Stay tuned for Conan, coming up next!

Túrbínan loksins komin

Túrbínan komst í mínar hendur í dag eftir langa mæðu. Mæðan var orðin svo löng að eldri menn muna vart annað eins. Ég er ekki alveg sáttur með manninn sem seldi mér hana, það liggur í því að ég keypti nýja túrbínu af honum en mér sýnist þessi sem ég fékk vera endurbyggð. Sem þýðir í raun það að hún er notuð en með nýjum íhlutum, sem þarf ekki endilega að vera verra en ég vil bara fá það sem ég borga fyrir og finnst mér ég ekki vera að ætlast til of mikils með því. Hún er samt rosa flott, með poleruðu húsi o.s.frv. Svo á hún líka að geta framleitt 340 hestöfl sem ég ætla mér líka að láta hana gera með fínu Autronic tölvunni sem þeir í hestaflabúðinni ætla að selja mér.

Ég er búinn að hafa fína GLE túrbóinn hans Þóris í láni í vikunni og hefur þetta þ.a.l verið alveg svakalega skemmtileg vika. Hann keyrir nefninlega alveg svakalega hratt gamli rauð og spólar alltaf þegar hann er beðinn um það. Þetta blæs nátturulega heilmiklu lofti í mig og er ég orðinn ansi óþolinmóður við þessa bílamálara sem eru búnir að hafa bílinn minn á 9undu viku núna. Ég held að ég ráðleggi mönnum sem þurfa að láta mála fyrir sig seint að nota þetta verkstæði, allavega ætla ég að beina mínum viðskiptum annað í framtíðinni. Ég ætla að kíkja þarna uppeftir á morgun og það er bara eins gott að þeir verði langt komnir með þetta allavega lofuðu þeir bílnum fyrir páska.

Jæja ég segi frá einhverju skemmtilegu vonandi bráðlega.

Kv. Birkir

Pælingar um daginn og veginn

Já ég ætla að leyfa mér að skrifa smá um annað enda gúrkutíð í SAAB málum hjá mér m.a. afþví að ég er lasinn.

Í kvöldfréttunum var frétt um að hann Jón Ásgeir, baugsmaður hefði haldið aðalfund hjá sínu fyrirtæki og þar sagði hann meðal annars að ríkisstjórnin ætti næsta leik á borði ef matvöruverð ætti að lækka enn frekar. Þá sagði hann að ríkisstjórnin þyrfti að aflétta innflutningshöftum af grænmeti og ýmsum vörum sem framleiddar eru hér á landi en ekki má flytja inn afþví að þessi stjórn hefur svonefnda landbúnaðarstefnu.

Með því að aflétta þessum höftum væri hægt að fytja inn grænmeti frá einhverjum bananalýðveldum þar sem fólk er hneppt í þrælkun og því boðið að vinna fyrir engin laun, þá fengjum við kannski aðeins ódýrara grænmeti og Baugur meira í vasann sinn djúpa.

Ég spyr: Afhverju er ekki hægt að selja raforku til bænda fyrir austan fjall á niðursettu verði til þess að þeirra vörur verði samkeppnishæfar við þær útlendu? Vilja pólítíkusar hér á landi bara selja raforku á niðursettu verði til stóriðja sem íslendingar eiga eitthvað sáralítið í og skapa kannski eitthvað á annaðhundrað störf til lengri tíma ? Við vitum sko sannarlega að ekki fást íslendingar til þess að vinna við uppbyggingu virkjunarinnar fyrir austan!

Ég er ekki alveg til í að þessi innflutningshöft verði felld niður með þeim afleiðingum að framleiðsla hér á landi myndi leggjast af. Þar með er ég líka ósammála þessari ríkisstjórn í því að halda virkilega stóriðja reddi öllu, ferðamannaiðnaður á Íslandi verður nefninlega sífellt stærri atvinnugrein en enginn vill koma til lands þar sem er búið að sökkva hálendinu undir einhver ljót uppistöðulón.
Ég er nefninlega kominn inn á þá línu að hlutirnir þurfi kannski ekki endilega að vera ofvaxnir til þess að eitthvað sé með þá gerandi, en þetta er bara alveg svakalega íslendingslegur þankagangur. Gera hlutina svo myndarlega að engu þurfi við að bæta seinnameir. Ég vona til dæmis að mennirnir sem eru að kaupa alla evrópu núna sbr. KB-Banki, Baugur og Bakkavör hafi hugsað dæmið til enda vegna þess að einusinni sagði vitur maður: Things you own, end up owning you.

Allavega finnst mér þessi ríkisstjórn frekar þunnur pappír hún þynntist eiginlega alveg út eftir að Halldór tók við. Ég er á því að Davíð hafi nú verið hálfu skárri en þetta dauðyfli sem Dóri er, allavega var stundum hægt að hlæja að yfirgengilegum hroka og frekju Davíðs en hinn er bara plein leiðinlegur.

Þetta er allavega eins og þetta horfir við mér, margt sem þarf að bæta en auðvitað verða alltaf misjafnar skoðanir á hlutunum og mín skoðun kannski langt frá því að vera rétt.

Kv. Birkir

Stofnun SAAB klúbbs og önnur mál

Þar sem ég var staddur í kaffi hjá Nóna ásamt Þóri fórum við að telja upp þá sem líklega gengju í SAAB klúbbinn þegar kemur að því að stofna hann. Þetta voru hátt í 40 nöfn á lista sem er nokkuð gott. Þá fórum við einnig í smá nafnahugleiðingar, ef einhver er hér sem les þetta og er með góða hugmynd þá má sá hinn sami koma með hana sem comment. Ég verð með frekari upplýsingar hér þegar kemur svo að stofnunninni sjálfri.

Ég leit við í Víkur-Ósi í dag, þeir voru þá búnir að grunna stóran hluta spoilerkittsins þannig að ekki líður að löngu þar til þeir mála það. Um bílinn sjálfan veit ég minna en ég er samt að hugsa um að fara aðeins aftur á stúfana á morgun og segja þeim hvað væri frábært ef þeir yrðu nú búnir að þessu fyrir páska, þá eru þeir nú búnir að hafa rúman tíma til þess að gera þetta.
Ég er að ryðbæta skottlokið núna og gengur það vel, ætti raunar alveg að geta klárað það núna á eftir. Þá á eftir að vinna aðeins í húddinu og hurðunum.
Vélin fer nú líka að skríða saman, ég er búinn að hóna, stimparnir liggja í olíubaði og bíða þess að verða póleraðir, gaman er að geta þess að ég mældi slífarnar og þær eru sko langt fyrir innan slitmörk sem segir manni bara það að þetta eru alveg svaka góðar vélar.

Sem sagt gangur í þessu hjá kallinum. Bless í bili.